YANGA YATANGAZA MSIBA WA SHABIKI MAARUFU MZEE MPILI

Mzee Mpili

Shabiki maarufu na mwanachama wa klabu ya Yanga, Haji Omar Ramadhani Mpili (Mzee Mpili), amefariki dunia usiku wa Septemba 27, 2026, katika Kituo cha Afya Wilaya ya Ikwiriri, Mkoa wa Pwani, alipokuwa akipatiwa matibabu.

Mzee Mpili alikuwa miongoni mwa mashabiki na wanachama waliotambulika kwa muda mrefu katika familia ya Yanga, akijulikana kwa ukaribu wake na klabu hiyo na ushabiki wake wa muda mrefu.

Uongozi wa Yanga umetangaza msiba huo kupitia Idara ya Habari na Mawasiliano ya Young Africans Sports Club, ukitoa pole kwa familia, ndugu, jamaa, marafiki pamoja na wadau wa soka walioguswa na kifo cha mwanachama huyo.

Kwa mujibu wa taarifa ya klabu hiyo, mazishi ya Mzee Mpili yanatarajiwa kufanyika Septemba 28, 2026, saa 10:00 jioni katika Makaburi ya Msikiti Mkubwa, Ikwiriri, Mkoa wa Pwani.

Yanga imewataka wanachama, mashabiki na wote walioguswa na msiba huo kumuombea marehemu pamoja na kusimama pamoja na familia yake katika kipindi hiki cha majonzi.

Mwenyezi Mungu ailaze roho ya marehemu mahali pema peponi. Amina.