RONALDO AONDOKA KAMBINI PORTUGAL BAADA YA KAULI YA КОСНА

Cristiano Ronaldo (41) ameondoka kwenye kambi ya timu ya taifa ya Portugal kuelekea mchezo wa UEFA Nations League dhidi ya Denmark, baada ya kocha Jorge Jesus kusema mshambuliaji huyo hatakuwa kwenye kikosi cha kwanza.

Cristiano Ronaldo

Uamuzi huo umefikiwa muda mfupi baada ya Jesus kueleza kwenye mkutano na waandishi wa habari kuwa Gonçalo Ramos ndiye aliyepangwa kuanza mchezo huo, huku Ronaldo akitarajiwa kubaki benchi.

Ronaldo pia hakushiriki katika ushindi wa Portugal wa mabao 2-1 dhidi ya Norway Jumapili, na tangu mchezo huo hajafanya mazoezi pamoja na wachezaji wenzake, jambo lililoibua maswali kuhusu hali iliyopo ndani ya kikosi.

Katika taarifa yake, Ronaldo alisema ameamua kuondoka kambini baada ya mazungumzo na Rais wa Shirikisho la Soka la Portugal, Pedro Proença. Alisema kwa wakati muafaka ataeleza sababu zilizomfanya kuchukua uamuzi huo.

Jesus, hata hivyo, amekanusha kuwepo kwa mgogoro kati yake na Ronaldo, akisisitiza kuwa yeye ndiye mwenye jukumu la kufanya maamuzi ya kikosi na kwamba kanuni hizo zinawahusu wachezaji wote.

Kocha huyo pia alikiri kuwa Ronaldo alitarajia kucheza dhidi ya Norway, lakini mazingira ya mchezo yalimfanya abadili uamuzi. Jesus alisema aliona ni kosa kumtuma Ronaldo kwenda kufanya mazoezi ya kujiandaa kuingia uwanjani kwa muda mrefu bila hatimaye kumtumia.

Portugal inaongoza Kundi A4 ikiwa na pointi sita baada ya kushinda mechi zake mbili za kwanza, lakini sasa mchezo dhidi ya Denmark utaingia uwanjani bila Ronaldo aliyekuwa sehemu muhimu ya kikosi hicho.