JEZI MPYA ZA TAIFA STARS: WIZARA YATOA TAMKO, MAKONDA AAGIZA UCHUNGUZI WA MKATABA

Paul Christian Makon

Sakata la jezi mpya ya Timu ya Taifa ya Tanzania, Taifa Stars, limeingia katika hatua mpya baada ya Wizara ya Habari, Utamaduni, Sanaa na Michezo kutoa taarifa ikisema Waziri Paul Christian Makonda haitambui matangazo ya jezi hiyo, huku mchakato wa kuzibadilisha ukielezwa kutohusisha Wizara. Taarifa hiyo imetolewa leo, Septemba 18, 2026, siku chache baada ya Shirikisho la Mpira wa Miguu Tanzania (TFF) kutangaza jezi hizo na kuanza kwa mchakato wa kuziuza kupitia Sandaland.

Kwa mujibu wa Wizara, Waziri Makonda alitoa maelekezo mwezi Februari 2026 kwamba mchakato wa kuboresha jezi za timu za taifa uzingatie pia manufaa mapana kwa nchi, ikiwemo fursa ya kibiashara kutokana na mauzo ya jezi hizo. Wizara imesema Serikali inawekeza fedha katika maandalizi ya timu za taifa, hivyo kuna umuhimu wa mikataba na fursa zinazohusiana na timu hizo kuangaliwa kwa maslahi mapana.

Katika hatua nyingine, Waziri Makonda ametangaza kuunda Kamati maalum ya kuchunguza mkataba wa mzabuni wa jezi hizo. Uchunguzi huo, kwa mujibu wa taarifa ya Wizara, utalenga pamoja na mambo mengine kubaini manufaa ya mkataba huo kwa timu za taifa na namna fursa ya mauzo ya jezi inavyoweza kuchangia katika uendeshaji wa timu hizo.

Clifford Ndimbo

Upande wa TFF, Ofisa Habari na Mawasiliano wa Shirikisho hilo, Clifford Ndimbo, amenukuliwa akisema suala hilo linaendelea kushughulikiwa na kwamba liko katika mamlaka husika. “Kuhusu swala la jezi linafanyiwa kazi, mamlaka ya juu,” Ndimbo amesema, akijibu swali kuhusu mjadala unaoendelea kuhusiana na jezi hizo.

Kabla ya taarifa ya Wizara, TFF ilikuwa imeshatangaza jezi mpya ya Taifa Stars, huku taarifa za mauzo zikieleza kuwa jezi hizo zimeanza kupatikana katika maduka ya Sandaland nchini. Hali hiyo imeongeza mjadala kuhusu mchakato uliotumika kuandaa, kuidhinisha na hatimaye kuzitangaza jezi hizo.

Jemedari Said

Miongoni mwa wadau waliozungumzia suala hilo ni Jemedari Said, ambaye amesisitiza kuwa mchakato wa jezi unapaswa kupitia hatua mbalimbali kabla ya kufikia uzinduzi. 

“Suala la jezi za Taifa au klabu yoyote ni mchakato mrefu kiasi, kuanzia kufanya designing ikawe approved... halafu mzabuni akatengeneze sample halafu ionekane na kuridhiwa tena,” Jemedari Said amesema. 

Akizungumzia pia muonekano wa jezi hizo, Mtipa amesema baada ya kuziona moja kwa moja amezipokea vizuri, akisema, “Mimi kwangu jezi kabambe kabisa hizi ukivaa unajivunia.”

Wakati mjadala huo ukiendelea, jambo lililo mbele sasa ni ufafanuzi wa mchakato na mamlaka zilizohusika katika hatua mbalimbali za jezi hiyo, pamoja na matokeo ya uchunguzi ambao Waziri Makonda amesema atauunda kuhusu mkataba wa mzabuni. Kwa sasa, TFF imesema suala hilo lipo kwenye mamlaka husika, huku Wizara ikiwa imeshaweka wazi kuwa inataka mkataba huo uchunguzwe.