Tetesi za Feisal Salum kujiunga na Yanga zapata nguvu, nini kinaendelea?

Hatma ya kiungo Feisal Salum imeendelea kuwa gumzo katika soka la Tanzania baada ya taarifa mpya kuibua maswali kuhusu hatua inayofuata ya mchezaji huyo kuelekea msimu mpya.

Kwa mujibu wa taarifa zinazozunguka, Feisal hatakuwa sehemu ya wachezaji watakaoshiriki mchezo ujao wa Azam FC.

Taarifa hizo zimeongeza mjadala kuhusu mustakabali wa Feisal, ambaye kwa siku kadhaa amekuwa akihusishwa na uwezekano wa kuondoka Azam FC na kujiunga na Yanga SC.

Madai mengine yanayoendelea kusambaa yanaeleza kuwa Feisal tayari amefikia makubaliano na Yanga, huku hatua inayodaiwa kubaki ikiwa ni mazungumzo kati ya klabu hizo mbili.

Hata hivyo, mpaka sasa hakuna tamko rasmi kutoka kwa Feisal Salum, Azam FC au Yanga SC kuthibitisha kuwa makubaliano hayo yamefikiwa au kwamba uhamisho huo umekamilika.

Mbali na taarifa zinazomhusu Feisal, suala la jezi namba 6 kwenye kikosi chaYanga limeongeza maswali zaidi. Namba hiyo haikuonekana kutolewa kwa mchezaji yeyote, huku Fred Ngoma, ambaye awali alihusishwa na kuvaa namba hiyo, akionekana akiwa na jezi namba 8.

Kwa baadhi ya mashabiki, kutokuwepo kwa mwenye jezi hiyo pamoja na tetesi zinazomhusu Feisal kumeongeza tafsiri kwamba kuna jambo linaweza kuwa linaendelea ndani ya klabu hiyo. Hata hivyo, suala hilo bado halijapata uthibitisho rasmi.

Kwa sasa, kinachosubiriwa ni taarifa rasmi kutoka pande zote mbili.